بالصدفة دخلت مدونتك اخ ياسر (عن طريق الفيديو الجديد). قرات التدوينه هذي وضحكت لمن قرات اسم مدارس الرياض. يالله المدرسة هذي خرجت اجيال. انا متخرج جديد تقريباَ (قبل اربع سنوات) وبعض مدرسينك درسوني ايضاَ (يوسف عامر على سبيل المثال) الله يذكره بالخير.

وكمان ما انسى البسبوسه، البيتزا، الهمبرجر دجاج. الحمص.. الاكل الدسم الي يسمونه فطور، ولا الكوبونات الملونه.

شكراَ اخ ياسر على هذي التدوينة الجميلة الي ذكرتني بمواصلة المدرسين حتى اذا تخرجت وتغربت.

مرحبا ياسر..
شي حلو العودة لأيام المدرسة .. خصوصاً ان اللي في عمرنا (اتكلم عن نفسي ) صار له فترة طويلة نوعاً ما دخل كلاس ..
بالمقارنة مع المسرح اللي شفته في مقطع اليوتيوب هذا، راح يكون مضحك لو جبت لكم صورة من المسرح اللي كنا نسوي عليه حفلات نهاية السنة في قريتنا الداهنة (قرية تتوسط المسافة ما بين شقراء والمجمعة) … جزء من السب الرئيسي في المدرسة نسكره من الجهتين ونحط الكراسي في الحوش المقابل له وهات يا فقرات

ارجع للهوم ورك:

1-أفضل مرحلة تعليمية درستها ؟
__ بدون جدال المرحلة الثانوية، لأني كنت متفوق جداً خلال الدراسة في ثانوية شقراء وكان لي وضعي :) بين الطلبة

2- أسوأ مرحلة تعليمية مرت عليك ؟
__ بدون جدال أيضاً المرحلة الجامعية … خيبات كثيرة لطالب كان متفوق … ومعدل يكاد يحبو … وسنوات طويلة من الدراسة ما تنعد ..

3- أفضل المدرسين اللي مروا عليك ؟
___ أحمد دفع الله: انجليزي - متوسطة…. و صلاح الرمادي: كيمياء - ثانوية….. و منصور المالك: هندسة نفط - الجامعة…. ومساعد العواد: هندسة نفط الجامعة ….. و وليد طاهر: مساحة- الجامعة ….. و فيصل الصقير: ستاتيكا- الجامعة.

4- أحب المواد اللي درستها ؟
__ الانجليزي - الكيمياء - التذوق الأدبي - ومواد النفط عموماً

5- أكره المواد اللي مرت عليك ؟
__ الفلودينج عند دكتور ما ينحب ابد … والفورتران عند دكتور ثاني ثقيل طينة ….
6- آخر شهادة حصت عليها .. وتخصصك ؟
ا__ لجامعية - هندسة بترول

7 أطرف موقف مر عليك في دراستك ؟
أطرف موقف كان عندنا واحد من الدكاترة اللي احبهم مرة … كان عندنا مادة في الترم قبل الاخير اسمها (والا ماودي اقول اسمها علشان ما ينعرف :)) وهي مادة للطلبة الخريجين وكانت عبارة غن اجتماع اسبوعي نتكلم فيه عن توبيكس معينة في التخصص .. وكنا سبعة طلبة … وفي اخر سبعة اسابيع يبدا كل طالب يسوي مشروع معين .. اربغة سووا قبلي ولما جا اسبوعي اللي هو قبل الاختبارات بثلاث اسابيع ما حضرت .. ولا سويت اصلاً إعداد للسمينار .. لما تجمعوا الطلبة وكان يوم اثنين .. انتظروني شوي .. شوي ما جيت … الغى الدكتور الاجتماع وقال: الله يهدي عبدالله .. بس فاضي يزبرق نفسه في الجرايد … كان فيه قصيدة منشورة لي في جريدة الرياض قبلها بيوم … لما قالوا لي زملائي زعلت الحقيقة وقلت في نفسي ما كان له حق … بعدين حصل لي ظروف معينة وما قدرت احضر الاختبارات النهائية … فلما جيت بداية الترم الثاني رحت لوكيل الكلية وقلت له حصلت ظروف كذا وكذا وما قدرت احضر الاختبارات .. سألني عن رقمي قلت له كذا وكذا .. شيك عليه في الكمبيوتر وقال ولا مادة حضرت؟ قلت له ولا مادة … قال بس انت ناجح في المادة الفلانية (مادة الدكتور نفسه ) .. تفاجأت وتخربطت … وقلت ايه ايه .. هذي اختبرناها قبل نهاية الترم بثلاث اسابيه :):) …. صار الدكتور منجحني الله يوفقه :):).

8- أصعب موقف مر عليك في دراستك ؟
أصعب موقف مر علي لما دخلت اختبار انجليزي عن ولد خالتي في الاداب … وجاني الدكتور وقال لي وش اسمك انت .. قلت له اسم ولد خالتي .. قال .. متى وقت محاضرتك .. قلت من ثنتين لثلاث … ثال انت محروم ( بعذره ما عمره شافني ) قلت له وشلون يا دكتور لا لا … انا مابي اقول شي بس اخاف يشك ان سكت … الا فيه مراقب سعودي جنبي قال انت جاوب وبعدين تفاهموا … ما صدقت على الله وكملت اجابتي وطلعت على طول من الممر (كان الاختبار في ممر) والقى ولد خالتي قلت الدكتور يقول انك محروم .. شيكت؟ قال لا … مشيك …. .. وطلعت النتايج واخذ بي بلس :).

شكراً لهالفرصة الجميلة من تدوير الذكريات

Pen
شكرا جزيلا على المرور، متنيا أن يستمر التواصل.
تحياتي

هذيان
عفيه على الشاطرة، تحلّين الواجب عشان اعطيك العلامة الكاملة،، و تكفين خليك صريحة خصوصا في السؤال رقم 7 و8.
تحياتي

الاخ محمد السقاف
الظاهر ان الكبر شين، أنا اسمي ياسر مو غسان، العائلة إسمها الغسلان،،، على اي حال (دونت ووري) دائما يصير هذا الخطأ.
والله صدقت يا ليتنا عارفين أن كتاب التخرج سيكون مرجعا تاريخيا كان تصورنا زين، خصوصا انه اصبح لسنوات عديده لاحقه مرجعا لبنات جيلنا في التعرف على الشباب الحلويين حقين دفعتنا،،،،:).
تصدق انك جبتلي فكرة تدوينة و هي الكتابة عن صورتي في كتاب التخرج بس الخوف من أني اصبح مضحكه للعالم خصوصا أن صورتي في ذلك الكتاب تظهرني و كأني متهم مقبوض عليه بتهمة تهريب مخدرات:).
تحياتي

الاخ الاستاذ الصديق غسان…

اتذكر ان جميع أساتذتنا فى جميع المراحل كانوا يرددونا عبارة واحدة ” هذه احلى مرحلة فى حياتكم” والان تأكدة انها احلى واجمل مرحلة فى حياتى واعتقد ان السبب بسيط للغاية ان اكبر همنا عندما نقوم بالصباح ماذا سوف نفعل اثناء الفسحة وعندما تنتهي الفسحة ماذا سوف نفعل بعد المدرسة وهكذا …. ربما هذا يكون السبب فى حصولي على درجات عالية!!! و استطيع ان اصف مشاعري لك عندما دخلت مدرستى لاسجل ابنائي وتقع عينى على كتاب التخرج واقلب صفحاته وتقع عينى على صورتى …. منظر مرعب !!! وهذا ينطبق على جميع الشباب … اه لو كنت اعلم كان رحت محل تصوير مرتب شوي

شكرا على الذكريات !!

..

واضح عندك ردة فعل من المرحلة المتوسطة ..

عموما .. عجبني موقفك

أستاذ ياسر

واجب وعن الدراسة وبالويك اند

يا لهوي ,,,,,!!!!!

دنته فكرتني بالمدرسين بتوعي الفلسطينيين اللي ما يعتقون حتى بالويد اند دراسة

هههههه اضحكتني والله ياياسر

موقف بصراحة محزن مو طريف ..

وفقك الله اخوي ياسر وسهل امرك

اثاريك زميل دراسة يا بندر؟؟؟؟، و الله الدنيا صغيرة
اتذكر البيتزا جيدا، سبحان الله كل ما تذكرت ايام الدراسة مع احد الزملاء تنذكر البيتزا، أظن كانو يحطون فيها مخدرات من كثر ما كنا مدمنين عليها، و كمان لا تنسى البسبوسه اللي كانت تنقط سكر، و الحمص اللي يخلص بلحستين و يبيعونه بثلاثة ريالات، كان الأكل غالي و مستغلينا مضبوط، بس عزالله كان الأكل طيب.
أيام يا بندر
تحياتي

شكلي كنت مشارك في ١٩٨٤ .. السنة إللي بعدها .. لأنه ما كان فيه بنات .. و غنينا المقطع الأول بس .. ما كملنا الأوبريت كله .. و كان وضعية إصطفاف الطلبة على المسرح تشكل حرف V .. ما يمنع إني مستمتع بالأوبريت كأني كنت مشارك فيه ..

أيام ..

تتذكّر البيتزا إللي في مطعم مدارس الرياض ؟

لو تعرف يا عم ياسر كم سنة و كم مرة بحثت عن أغنية مليون هلا .. و في كم منتدى دورت .. و موقع مدارس الرياض .. و أشرطتي القديمة ..

بإختصار ..

إنت بالموضوع الحلو هذا و الرابط العجيب هذا حققت لي شيء كنت أدوره من سنواااااااااااات .. و أخيراً لقيته ..

أنا شاركت معك في حفل مدارس الرياض .. و بالتحديد في أغنية مليون هلا .. ( و هذا السبب أني أبحث عنها منذ سنوات ) في حالة أنهم أعادوها في العام الذي تلاه .. فأنا شاركت فيه .. أما في حالة أنهم أدوها في حفل ختامي واحد فقط .. فأنا كنت معاك .. كنت أنا في الثالث إبتدائي .. و كنت متقدّم سنة ( داخل بدري ) ..

أشكرك كثيراً على الرابط

جندبي
حسستني أني شايب يا شيخ،، حرام عليك
تحياتي

ابوعتيق
افا عليك ، لحقت على سعودية يا سعودية بكل تفاصيلها، ما تشوف الأطخم واقف وسط هلبزارين اغني كني وائل كفوري الغاله.
تحياتي

هلا بو عبدالعزيز .. سبحان الله صدق الدنيا صغيرة الاستاذ يوسف ابو كويك على فكرة تراه درسني في مدارس الخليج في الصف الاول متوسط مادة العلوم بالفعل كان مدرس لطيف والمادة معه خفيفة نظيفة.
انت لحقت ايام اغنية سعودية يا سعودية حقت مدارس الرياض والا لا؟

انا يالنسبة لي كنت احب الفيزياء وشاطر فيها بس الرياضيات من جد احس في عندي عرق في المخ ضد هالمادة.

يا ليتني ارجع ايام المدرسة ولو عشرة ايام اكبر هم عندك هو الواجب او المذاكرة للامتحان. ما كان فيه شي اسمه هدف سنوي او شهري او اجتماعات.

سقا الله ايام زمان ..

اجل طلعت بروسلي ههههه رهيب هالموقف ، وما شاء الله عليك هالمقطع جدا جدا قديم ..

موفق استاذي العزيز

<<—- شافت المقطع تبع الأغنيه !!

وقلد أنني بس بسألك المايسترو عسى ما طار نهاية الأغنيه ؟
يعني بس كنت بأطمن خخخخ

<<– مقهورة مالها في اليوتيوب مقطع وهيا صغيره خخخخخ

ثم أنه خلاص نقطة

مشاعل
المواد العلمية كانت تعقدني، خصوصا أني عارف نفسي مانيب طالع لا دكتور و لا مهندس، بس وش نسوي حكم القوي على الضعيف.
شكرا ابلا مشاعل على العلامة الكاملة، الظاهر هذه اول مرة اخذ علامة كاملةفي حياتي.
تحياتي

إمممممم أولاً حمدلله ع السلامة

تانياً : ههههههههههه من جد مواقفكم غييييير
طيب طالما أخونا بالله بيبكي ليش مسوي فيها قوي وضربك ؟؟؟؟؟

إمممم يالله عشرة على عشرة مو لأنك حليت الواجب لألألأ لأنك ماتحب الرياضيات والكيمياء والفيزياء كدا إنت برااافو عليك طالب نجيب خخخخخخ تصدق عمري بحياتي ما حليت مسألة بالرياضيات والفيزياء دائماً أخلي الناتج فاضي لأن مافيا حيل أحسب كنت أستنى الثانوي بفارغ الصبر عشان ما أدرسها

تحياتي